Նավթի գները բարձրացել են՝ պայմանավորված Իրանի և Իսրայելի միջև հակամարտության սրացման մտավախությամբ:
Brent տեսակի նավթի հուլիսյան ֆյուչերսներն աճել են 34 ցենտով կամ 0.5 տոկոսով՝ հասնելով մեկ բարելի դիմաց 73.57 դոլարի։ ԱՄՆ West Texas Intermediate (WTI) տեսակի նավթը բարձրացել է 29 ցենտով կամ 0.4 տոկոսով՝ կազմելով 72.06 դոլար։
ԱՄՆ պաշտպանության նախարար Փիթ Հեգսեթը երկուշաբթի օրը Fox News-ին ասել է, որ նախագահ Դոնալդ Թրամփը, չնայած ԱՄՆ դաշնակից Իսրայելի և Թեհրանի միջև սրացած լարվածությանը, դեռ նպատակ ունի Իրանի հետ միջուկային համաձայնության հասնել։
Հարցին, թե արդյոք Թրամփը շարունակում է ձգտել միջուկային գործարքի, Հեգսեթը պատասխանել է. «Իհարկե»։
Իսրայելի զինված ուժերը պնդում են, որ սպանել են Ալի Շադմանիին, ում ներկայացրել են որպես Իրանի պատերազմի ժամանակ գլխավոր շտաբի պետ և նշել, որ նա եղել է իրանական բանակի ամենաբարձրաստիճան սպան։ Թեհրանը չի հաստատել այս տեղեկությունը:
«Մեծ յոթնյակը» (Մեծ Բրիտանիա, Կանադա, Ֆրանսիա, Գերմանիա, Իտալիա, Ճապոնիա և ԱՄՆ) երկուշաբթի տարածած հայտարարությամբ շեշտել է, որ Իրանը չպետք է երբևէ ունենա միջուկային զենք, իսկ Իսրայելն ունի ինքնապաշտպանվելու իրավունք։
Երեքշաբթի վաղ առավոտյան Թեհրանում պայթյուններ են հնչել, արձանագրվել է ինտենսիվ հակաօդային պաշտպանություն, հաղորդում են իրանական լրատվամիջոցները։ Asriran լրատվական կայքի տվյալներով՝ հակաօդային համակարգերն ակտիվացել են նաև Նաթանզ քաղաքում, ուր տեղակայված են Իրանի առանցքային միջուկային օբյեկտները՝ Թեհրանից մոտ 320 կմ հեռավորության վրա։
Իսրայելում կեսգիշերից հետո օդային տագնապի ազդանշաններ են հնչել Թել Ավիվում: Լսվել է նաև պայթյունի ձայն:
ԱՄՆ նախագահ Դոնալդ Թրամփը սոցիալական մեդիայում գրառմամբ հորդորել է Թեհրանի բնակիչներին անմիջապես լքել քաղաքը։
«Իրանը պետք է ստորագրած լիներ «այդ համաձայնագիրը»։ Ես նրանց ասել էի՝ ստորագրեք։ Ինչ ամոթ է ու ինչ անիմաստ մարդկային կորուստ։ Պարզ ասած՝ ԻՐԱՆԸ ՉԻ ԿԱՐՈՂ ՈՒՆԵՆԱԼ Միջուկային ԶԵՆՔ։ Ես դա ասել եմ նորից ու նորից», - գրել է Թրամփը Truth Social հարթակում, - «Բոլորը պետք է անմիջապես տարհանվեն Թեհրանից»։
Իրանը ՄԱԿ-ում հայտարարել է՝ Իսրայելի հարվածների հարցում երրորդ երկրների ցանկացած օժանդակություն ու համագործակցություն «նրանց դարձնում է այս ճգնաժամի իրավական պատասխանատվության և հետևանքների մասնակից»։
Կոնկրետ երկրների անուններ, սակայն, Թեհրանի պաշտոնական ներկայացուցիչը չի տվել:
Իրանի արտաքին գործերի նախարար Աբբաս Արաղչին հայտարարել է, որ Միացյալ Նահանգները «մեկ հեռախոսազանգով» կարող է կանգնեցնել Իսրայելի հարձակումները Իսլամական Հանրապետության վրա:
«Իսրայելը պետք է դադարեցնի իր ագրեսիան, և եթե մեր դեմ ռազմական ագրեսիան լիովին չդադարեցվի, մեր պատասխանները կշարունակվեն», - ասել է Արաղչին։
Իսրայելը սկսել է հարվածել Իրանի պետական հեռուստատեսությանը։ Թիրախավորումից առաջ Իսրայելի պաշտպանության նախարար Իսրայել Կացը զգուշացրել էր, որ շուտով Իրանի պետական հեռուստատեսությունն ու ռադիոն «կանհետանան»։ Մինչ այդ Իսրայելը տարհանման հրահանգ էր տվել Թեհրանի այն թաղամասի բնակիչներին, որտեղ գտնվում է հեռարձակողը։
Նեթանյահուն կոչ է անում Թեհրանի բնակչությանը տարհանվել
Իսրայելի վարչապետ Բենյամին Նեթանյահուն կոչ է անում Թեհրանի բնակչությանը տարհանվել, քանի որ առաջիկա ժամերին Իրանի մայրաքաղաքի ուղղությամբ կարող են նոր օդային գործողություններ ձեռնարկվել։
«Իսրայելի զինված ուժերը վերահսկում են Թեհրանի երկինքը։ Մենք մեր երկու հիմնական նպատակներին հասնելու ճանապարհին ենք։ Դրանք են Իրանի միջուկային և հրթիռային սպառնալիքների վերացումը։ Մենք ասում ենք Թեհրանի բնակիչներին՝ տարհանվեք և անցնում ենք գործի»,-հայտարարել է Նեթանյահուն։