Թուրքիայի նախագահը հեռախոսազրույց է ունեցել Ռուսաստանի նախագահի հետ: Անկարան հայտարարել է, թե Էրդողանն ու Պուտինը համաձայնել են, որ Իսրայել-Իրան հակամարտությունը պետք է ավարտվի՝ հնարավորություն բացելով դիվանագիտության համար։
Ավելի վաղ նաև Կրեմլի խոսնակն էր հայտարարել, թե Մոսկվան պատրաստ է միջնորդի դեր ստանձնել Իրանի և Իսրայելի միջև առճակատումը հարթելու համար։
«Ուրբաթ օրը Իսրայելի կողմից ձեռնարկված առաջին հարվածներից հետո Իրանի միջուկային օբյեկտներում՝ Նաթանզում և Ֆորդոյում, նոր ավերածություններ չկան», - այսօր հայտարարել է Ատոմային էներգիայի միջազգային գործակալության ղեկավար Ռաֆայել Գրոսին՝ այս կազմակերպության կառավարիչների խորհրդի արտահերթ նիստի ընթացքում։
Գրոսիի խոսքով՝ Նաթանզում ոչնչացվել են ուրանի հարստացման այն արտադրամասերը, որոնք ստորգետնյա չէին։
«Սպահանի միջուկային հետազոտությունների կենտրոնում ուրբաթ օրվա հարձակման հետևանքով չորս շինություն է վնասվել, այդ թվում՝ կենտրոնական քիմիական լաբորատորիան և ուրանի փոխակերպման գործարանը», - նշել է Գրոսին։
«Մոսկվան շարունակում է պատրաստակամություն հայտնել Իրանի և Իսրայելի միջև միջնորդական առաքելություն ստանձնելու հարցում», - այսօր լրագրողների հետ զրույցում հայտարարել է Կրեմլի պաշտոնական ներկայացուցիչ Դմիտրի Պեսկովը։
«Ռուսաստանը անհրաժեշտության դեպքում պատրաստ է միջնորդական ծառայություններ մատուցել կողմերին։ Սեղանին են նաև այն առաջարկները, որոնք ներկայացրել էր նախագահ Պուտինը Դոնալդ Թրամփի հետ նախորդ հեռախոսազրույցի ընթացում», - նշել է Պեսկովը։
Պեկինը կոչ է անում Իսրայելի և Իրանի իշխանություններին դիվանագիտական միջոցներով հաղթահարել առկա տարաձայնությունները։ Այս մասին այսօր հայտարարել է Չինաստանի ԱԳՆ պաշտոնական ներկայացուցիչ Գո Ցզյակունը։
«Կոչ ենք անում հակամարտության կողմերին անհապաղ քայլեր ձեռնարկել իրավիճակի լիցքաթափման, տարածաշրջանում կայունությունը չխաթարելու և ճշմարիտ ուղուն վերադառնալու համար», - նշել է Չինաստանի ԱԳՆ խոսնակը՝ հավելելով, - «Պեկինը մշտապես հանդես է եկել Իրանի միջուկային ծրագրի շուրջ առկա խնդիրների խաղաղ լուծման օգտին»։
Իսրայել-Իրան հակամարտության հետևանքով կարող են տուժել դեպի Հայաստան մատակարարումները, հայտարարում է ֆինանսների նախարար Վահե Հովհաննիսյանը։
Էկոնոմիկայի նախարար Գևորգ Պապոյանն այսօր ավելի վաղ տեղեկացրել էր՝ Իրանի տարածքով բեռների տեղափոխման խնդիրներ կան։ Հայկական բեռների մի մասը մնացել է Բանդար Աբբաս նավահանգստում և հարևան երկրի ճանապրհներին։
Իսրայելի Պաշտպանության նախարար Իսրայել Կացը այսօր հանդես է եկել Իրանի հասցեին հերթական կոշտ հայտարարությամբ՝ պնդելով, որ «Թեհրանի բնակիչները շատ շուտով ծանր գին կվճարեն»:
«Թեհրանի ամբարտավան բռնապետը վերածվել է վախկոտ մի մարդասպանի, որը թիրախավորում է խաղաղ բնակչությանը՝ փորձելով կանխել Իսրայելի Պաշտպանության բանակի կողմից իր ռազմական կարողությունների կործանումը», - հայտարարել է Կացը։
Պաշտոնական տեղեկությունների համաձայն՝ իրանական հարվածների հետևանքով Իսրայելում 24 խաղաղ բնակիչ է զոհվել։ Իրանում, Իսրայելի հարվածներ հետևանքով արձանագրված զոհերի թիվը հասել է 224-ի։ Իսլամական հանրապետության առողջապահության նախարարության տվյալներով՝ դրանց 90 տոկոսը խաղաղ բնակիչներ են։
«ՄԱԿ-ի Անվտանգության խորհուրդը պետք է կատարի իր պարտականությունները», - Mehr-ի փոխանցմամբ՝ մամուլի ասուլիսի ժամանակ հայտարարել է Իրանի արտգործնախարարության խոսնակ Իսմայիլ Բաղային՝ ընդգծելով՝ «զսպվածություն պահանջելը ոչ այլ ինչ է, քան երեսպաշտություն»:
«Այս պատերազմը միայն Իրանի դեմ չէ. դա պատերազմ է մարդկության դեմ։ Այս պատերազմը հակասում է Միավորված Ազգերի Կազմակերպության կանոնադրությանը, օրենքի գերակայությանը և բոլոր այն արժեքներին, որոնց համար մարդկությունը պայքարել է», - նշել է նա։
Իսրայելում ԱՄՆ դեսպան Մայք Հաքաբին երկուշաբթի օրը հայտարարել է, որ Թել Ավիվում գտնվող դեսպանատան շենքը աննշան վնասներ է կրել մոտակայքում իրանական հրթիռային հարվածից՝ հայտնելով, որ անձնակազմի անդամներից որևէ մեկը չի տուժել։
Նա X-ում գրել է, որ Իսրայելում ԱՄՆ դեսպանատունը երկուշաբթի օրը փակ կմնա:
Իսրայելի Հայֆայի քաղաքապետը հայտնել է, որ քաղաքում գիշերը Իրանի կողմից իրականացված հրթիռային հարձակման հետևանքով երեք մարդ է զոհվել։ Իսրայելում իրանական հարձակման հետևանքով զոհերի թիվը հասավ ութի:
Հաղորդվում է հարյուրավոր վիրավորների մասին:
Իսրայելի պաշտպանության բանակը հայտարարել է Թեհրանում գտնվող «Քուդս» ուժերի հրամանատարական կենտրոններին հարվածելու մասին։
Իսրայելի պաշտպանության բանակը հայտարարել է, որ կենտրոնները «Քուդս» ուժերի կողմից օգտագործվել են «Իսրայելի դեմ ահաբեկչական հարձակումներ պլանավորելու համար՝ Մերձավոր Արևելքում իրանական ռեժիմի լիազորված անձանց միջոցով»։
