Իսրայելական կողմի հարվածների հետևանքով սպանվել են Իրանի Իսլամական հեղափոխության պահապանների կորպուսի (ԻՀՊԿ) հետախուզական կազմակերպության ղեկավար Մոհամմադ Քազեմին և նրա երկու գործընկերները՝ Հասան Մոհակեքը և Մոհսեն Բաքերին:
IRNA-ի փոխանցմամբ՝ ԻՀՊԿ-ն հայտարարել է, որ կորպուսի ավիատիեզերական ուժերը հարվածներ են հասցրել Իսրայելում գտնվող հետախուզական կենտրոններին:
Իսրայելում անցած գիշեր իրանական հրթիռների հարվածների հետևանքով չորս մարդ զոհվել է, հաղորդում է The Times of Israel-ը՝ հղում անելով Իսրայելի շտապօգնության ծառայությանը։ Լրատվամիջոցի տվյալներով՝ մարմինները դուրս են բերվել փլատակների տակից, և փրկարարները շարունակում են որոնումները։
Մագեն Դավիդ Ադոմի շտապօգնության ծառայությունը հարվածներից վիրավորված 87 մարդու տեղափոխել է հիվանդանոցներ։ Հաղորդվում է, որ հինգ մարդ ստացել է միջին ծանրության վնասվածքներ, իսկ մնացածը՝ թեթև։
Երկուշաբթի վաղ առավոտյան իրանական հրթիռները հարվածել են Թել Ավիվին և Հայֆա նավահանգստային քաղաքին, հայտնում է Reuters-ը։
Ավելի վաղ էլ Իսրայելի ազգային արտակարգ իրավիճակների ծառայությունը հայտնել է, որ գիշերային հարվածների ժամանակ երկրի կենտրոնական հատվածում զոհվել է երեք մարդ, տասնյակները՝ վիրավորվել։
Հրապարակված տեսանյութում, ըստ Reuters-ի, Թել Ավիվի երկնքում երևում են հրթիռներ և պայթյուններ են լսվում այնտեղ և Երուսաղեմում։ Թել Ավիվի խիտ բնակեցված թաղամասում մի քանի բնակելի շենքեր ավերվել են հարվածի հետևանքով, ինչպես նաև կոտրվել են հյուրանոցների և մոտակա այլ տների պատուհաններ, որոնք գտնվում են ԱՄՆ դեսպանատան շենքից ընդամենը մի քանի հարյուր մետր հեռավորության վրա։
Կոնտրոնական Իսրայելում իրանական հրթիռների հարվածների հետևանքով զոհվել է երեք մարդ, հայտնում է Time of Israel-ը՝ հղում անելով տեղական իշխանություններին։
Շտապօգնության աշխատակիցները հիվանդանոցներ են տեղափոխել 74 մարդու, հինգ մարդու՝ միջին ծանրության և 68 մարդու՝ թեթև ծանրության։
Թեհրանը «ավերիչ պատասխանով» է սպառնում Իսրայելին
«Իրանի քաջարի մարտիկների կողմից ավերիչ պատասխանի մասշտաբները, անկասկած, կընդգրկեն օկուպացված տարածքների բոլոր հատվածները», - հայտարարել է Իրանի զինված ուժերի խոսնակ, գնդապետ Ռեզա Սայադը։
«Լքեք օկուպացված տարածքները, քանի որ դրանք այլևս բնակելի չեն լինի ապագայում, ապաստարանները ևս չեն երաշխավորի անվտանգությունը», - Իրանի պետական հեռուստատեսության եթերում հայտարարել է բարձրաստիճան զինվորականը։
Իրանի Իսլամական հեղափոխության պահապանների կորպուսը հաստատեց՝ Իսրայելի հարվածների հետեւանքով սպանվել է Հետախուզական ծառայության ղեկավար Մոհամմադ Քազեմին։ Ըստ «Ազատության» իրանական ծառայության, սպանվել է նաև Քազեմիի տեղակալը՝ Հասան Մոհաղեղը, ինչպես նաեւ մեկ այլ զինվորական։
Ավելի վաղը լուրը հայտնել էր Իսրայելի վարչապետ Բենիամին Նեթանյահուն՝ Fox News հեռուստաալիքին տված հարցազրույցում։
Քազեմին Իսլամական հեղափոխության պահապանների կորպուսի հետախուզությունը ղեկավարում էր 2022 թվականից։
Իրանի առողջապահության նախարարության համաձայն, ուրբաթ օրվանից ի վեր Իսրայելի հարվածներից 224 մարդ է զոհվել ՝ այդ թվում երեխաներ։ Վիրավորների թիվն, ըստ գերատեսչության, անցնում է 1200-ից։
Նախարարության խոսնակ Հոսեյն Քերմանպուրը X-ում հրապարակած գրառման մեջ նշել է, որ զոհերի 90 տոկոսը խաղաղ բնակիչներ են։
Իսրայելի պաշտոնական աղբյուրները ավելի վաղ հայտնել էին Իրանի հարվածների հետեւանքով 13 զոհի, 380 վիրավորի մասին։
Իրանի փոխարտգործնախարար Ֆորմին Խաթիբզադեն հայտարարել է, որ Իսրայելը հարվածել է Իրանի արտգործնախարարության մասնաշենքերից մեկին, ինչի հետևանքով գերատեսչության մի խումբ աշխատակիցներ վիրավորվել են, հաղորդում է IRNA պետական լրատվական գործակալությունը։
Իրանի արտգործնախարարի մեկ այլ տեղակալ ՝ Սայիդ Խաթիբզադեն էլ պնդել է՝ Իսրայելը դիտավորյալ է թիրախավորել Թեհրանում գտնվող արտգործնախարարության շենքը։
«Իսրայելի հանցավոր ռեժիմը դիտավորյալ և անողոք հարված է հասցրել Իրանի արտաքին գործերի նախարարության շենքերից մեկին», - X-ում գրել է Խաթիբզադեն՝ հրապարակելով տեսանյութ, որում երևում են ջարդված պատուհաններ և հատակին թափված բեկորներ։
«Հարձակման հետևանքով մի քանի քաղաքացիական անձինք վիրավորվել են»։
Իրանական աղբյուրները տուժած պաշտոնյաների մասին այլ մանրամասներ դեռ չեն հաղորդել։
Իսրայելի արտակարգ իրավիճակների ծառայությունը հայտնում է Հայֆայում Իրանի հրթիռային հարվածի հետեւանքով բռնկված հրդեհի մասին։ Իսրայելական աղբյուրները տուժածների մասին հաստատված տվյալներ դեռ չեն հաղորդում. Times of Israel-ը հայտնում է չորս, Jerusalem Post-ը՝ վեց վիրավորի մասին։
Նույն աղբյուրների փոխանցմամբ, հարձակումների ալիքը այս պահին ավարտվել է, բնակիչներին թույլատրել են լքել ապաստարանները։
Բրյուսելը արտահերթ նիստ է հրավիրում
ԵՄ դիվանագիտության ղեկավար Կայա Կալասը երեքշաբթի տեսակապով հանդիպման է հրավիրել դաշինքի անդամ երկրների արտգործանախարարներին՝ քննարկելու Մերձավոր Արևելքի իրադարձությունները, տեղեկացնում է ԵՄ արտգործնախարարի խոսնակը։
«Հանդիպումը հնարավորություն կտա մտքեր փոխանակել, համակարգել Թել Ավիվի և Թեհրանի հետ դիվանագիտական կապերը եւ հնարավոր հաջորդ քայլերը»,- փոխանցել է Եվրամիության պաշտոնյան։