Իսրայել-Իրան հակամարտությունն է՛լ ավելի է թեժանում. թարմացվող

Իսրայելական «El Al Airlines» ընկերությունը մեկ շաբաթով՝ մինչև հունիսի 23-ը, չեղարկել է չվերթները դեպի Եվրոպայի բազմաթիվ քաղաքներ, ինչպես նաև Տոկիո և Մոսկվա։

Իրանի քաղաքացիական ավիացիայի կազմակերպությունն էլ, ըստ տեղական լրատվամիջոցների, երկարաձգել է չվերթների չեղարկումը մինչև երկուշաբթի՝ Երևանի ժամանակով ժամը 02:00-ը:

Իսրայելական Բաթ Յամ քաղաքը՝ Իրանի հարվածներից հետո.

Իսրայելի կառավարության տվյալներով՝ ուրբաթ օրվանից Իրանը մոտ 200 հրթիռ է արձակել Իսրայելի ուղղությամբ, 22 դեպքում դրանք հասել են իրենց թիրախներին՝ խուսափելով հակաօդային պաշտպանությունից։ Այսօր կեսօրի դրությամբ, իրանական հրթիռային հարվածներից Իսրայելում զոհվել է 13 մարդ, մոտ 400 մարդ վիրավորվել է, որոնցից 9-ը ծանր վիճակում են։

Իրանի պաշտոնյաներից մեկը BBC-ի հետ զրույցում հաստատել է, որ Իսրայելի վերջին հարվածներից տուժել է նաև Պաշտպանության նախարարության՝Սպահանի կենտրոնում գտնվող կենտրոնակայանը։

Սպահանի անվտանգության հարցերով փոխնահանգապետ Ակբար Սալեհին նշել է, որ մինչ այժմ զոհերի մասին չի հաղորդվել, ներկայումս գնահատվում է հասցված վնասը։

Իրանը հայտարարել է, որ ձերբակալել է Իսրայելի հետախուզական գործակալության՝ Մոսադի երկու գործակալների։ Ըստ կառավարամետ Tasnim լրատվական գործակալության, ձերբակալություններն իրականացվել են Ալբորզ նահանգում։ Այլ մանրամասներ առայժմ չեն հաղորդվել։

Թեհրանի փողոցներում սգո պաստառներ են՝ իսրայելական հարվածներից զոհված բարձրաստիճան զինվորականների լուսանկարներով

Իսրայելի պաշտպանության նախարար Իսրայել Կացը հայտարարել է, որ ինքն է հրահանգել տարհանման ծանուցումներ ուղարկել Թեհրանի այն բնակիչներին, որոնք ապրում են զենքի արտադրության գործարանների կամ միջուկային օբյեկտների մոտ՝ «նրանց իսկ անվտանգության համար»։

Ավելի վաղ Լիբանանում «Հեզբոլլահի» դիրքերը թիրախավորելիս ևս Իսրայելը նման ծանուցումներ էր ուղարկում տեղացիներին։ Զինվորականները, մասնավորապես, հաճախ նշում էին Բեյրութի այն շենքերը, որոնք հայտնվելու էին հարձակման թիրախում՝ հորդորելով մերձակայքում գտնվող բնակիչներին ժամանակավորապես լքել տարածքը։

«Իրանի բռնապետը Թեհրանը վերածում է Բեյրութի, իսկ Թեհրանի բնակիչներին՝պատանդառում իր ռեժիմի գոյատևման համար», - հայտարարել է Իսրայելի պաշտպանության նախարարը։

Իսրայելի նավթավերամշակման գործարանները հայտարարում են, որ Հայֆայում խողովակաշարեր ու փոխանցման գծեր են վնասվել իրանական հրթիռային հարձակումներից։

Առաջին լուսանկարները՝ Իսրայելի վրա Իրանի գիշերային հարվածներից հետո

Այս պահի տվյալներով, զոհվել է առնվազն 10 մարդ, վիրավորվել՝ ավելի քան 100-ը։

Իսրայելում , ըստ BBC-ի, շատերն են ցնցված Իրանի կողմից իրականացված հրթիռային հարձակումների երկու ալիքներից, որոնց հետևանքով զոհվել է առնվազն 10 մարդ, այդ թվում՝ երկու երեխա։ Պաշտոնյաները վերջին ժամերին պարբերաբար հայտարարում են, որ առջևում դժվարին օրեր են սպասվում, և որ Իրանի դեմ հարձակումները կշարունակվեն, թերևս՝ մի քանի շաբաթ. «դրա վերջնական նպատակը, սակայն, մնում է անհայտ», փաստում են արևմտյան լրատվամիջոցները։

Երեկ երեկոյան Իսրայելի վարչապետ Նեթանյահուն սպառնացել է՝ մինչ օրս իրականացված հարվածները «ոչինչ են այն ամենի համեմատ, որ Իրանը կտեսնի առաջիկա օրերին»։

Վարչապետի քննադատները մինչդեռ պնդում են՝ դիվանագիտությունն է Իրանի միջուկային ծրագրի շուրջ տարաձայնությունները հարթելու միակ ճանապարհը։

Իսրայելի հարվածներից հետո Իրանը չեղարկեց ԱՄՆ-ի հետ բանակցությունների վեցերորդ փուլը, որը պետք է կայանար այսօր Օմանի մայրաքաղաքում։ Իրանի արտգործախարար Աբբաս Արաղչին այսօր ասել է, որ որևէ քննարկում չի լինի, քանի դեռ Իսրայելը «բարբարոսական հարձակումներ է իրականացնում»:

Իսրայելի վրա գիշերը Իրանի իրականացրած հրթիռային հարվածների հետևանքով զոհերի թիվը հասել է 10-ի, հաղորդում են իսրայելական պաշտոնական աղբյուրները։

Ըստ Ոստիկանության տվյալների՝ Թել Ավիվից հարավ գտնվող Բաթ Յամ քաղաքում վեց մարդ է սպանվել, այդ թվում՝ երկու երեխա։ Յոթ մարդ անհետ կորած է համարվում։

Արտակարգ ծառայությունների տվյալներով՝ չորս մարդ էլ սպանվել է արաբական Թամրա քաղաքի վրա հարձակման հետևանքով։