Իսրայել-Իրան հակամարտությունն է՛լ ավելի է թեժանում. թարմացվող

Իսրայելը տարհանման նախազգուշացում է տվել Իրանի միջուկային ռեակտորների մոտակայքում բնակվողներին։ X-ում պարսկերենով արված գրառման մեջ Իսրայելի պաշտպանության բանակի խոսնակը նշել է՝ «Բոլորը, որ գտնվում են ... ռազմական զենքի արտադրության գործարաններում, դրանց օժանդակ հաստատություններում կամ շրջակայքում, պետք է անհապաղ լքեն այդ տարածքները և չվերադառնան մինչև հետագա ծանուցում։ Ձեր ներկայությունը այս ենթակառուցվածքների կողքին վտանգի է ենթարկում ձեր կյանքը»։

Իրանը չի ցանկանում, որ Իսրայելի հետ հակամարտությունը տարածվի դեպի հարևան երկրներ, բայց ստիպված է դիմել ինքնապաշտպանության, այսօր հայտարարել է երկրի արտգործնախարարը։

Աբբաս Արաղչին պնդել է՝ Իսրայելի վերջին հարձակումները նպատակ ունեին խափանել միջուկային ծրագրի շուրջ ԱՄՆ-ի հետ սկսված բանակցությունները, ընդգծելով. «Վաշինգտոնը պետք է դատապարտի Իսրայելի հարվածները Իրանի միջուկային օբյեկտների վրա»:

Զոհեր ու վիրավորներ Իսրայելում՝ իրանական հարվածներից

Իսրայելի ոստիկանությունը հայտարարել է, որ Բաթ Յամում վեց մարդ զոհվել է, 180-ը՝ վիրավորվել, առնվազն 7 մարդ անհետ կորած է համարվում: Իշխանությունների տվյալներով՝ ևս չորս մարդ զոհվել է Իսրայելի հյուսիսում:

ԱՄՆ Նախագահը սպառնում է Իրանին. «եթե Ամերիկան որևէ կերպ հարձակման ենթարկվի, մեր զինված ուժերի ողջ ուժն ու հզորությունը կհասնեն ձեզ այնպես, որ մինչ օրս չեք տեսել»,- Truth Social-ում գրել է Դոնալդ Թրամփը։

Սպիտակ տան ղեկավարը միաժամանակ պնդել է, թե նույնիսկ այս պահին Ամերիկան կարող է «հեշտությամբ գործարք կնքել Իրանի և Իսրայելի միջև և վերջ դնել այս արյունալի հակամարտությանը»։

Գերմանիայի արտգործնախարարը հայտարարել է, որ Գերմանիան, Ֆրանսիան և Մեծ Բրիտանիան պատրաստ են անհապաղ բանակցություններ սկսել Թեհրանի միջուկային ծրագրի շուրջ՝ Մերձավոր Արևելքում իրավիճակը հանդարտեցնելու համար։

«Հուսով եմ՝ դա դեռ հնարավոր է, և մեր առաջարկը կընդունվի», - շաբաթ օրը ուշ երեկոյան գերմանական հեռուստատեսությանն ասել է արտգործնախարար Վադեֆուլը, հավելելով՝ «հիմնական նախապայմանն է, որ Իրանը որևէ վտանգ չներկայացնի ո՛չ տարածաշրջանի, ո՛չ Իսրայել պետության, ո՛չ էլ Եվրոպայի համար»։

Իրանի նավթի նախարարությունը հայտարարել է, որ Իսրայելի վերջին հարվածների ժամանակ տուժել է նաև Թեհրանում գտնվող Շահրանի նավթամբարը։ Նախարարության պաշտոնյան The New York Times-ին ասել է, որ պահեստում գտնվող 11 ռեզերվուարները պայթել են մեկը մյուսի հետևից։ Պահեստի անմիջական հարևանությամբ ապրող իրանցիներից մեկի խոսքով, պայթյունների ուժգնությունը երկրաշարժի տպավորություն է թողել, տեղում լայնածավալ կրակ է բռնկվել։ Պաշտոնյաները հավաստիացնում են, որ իրավիճակը վերահսկողության տակ է։