Առնվազն 16 մարդ է զոհվել, ևս 28-ը վիրավորվել են այսօր կեսօրին Ռուսաստանի Զինված ուժերի կողմից Դոնեցկի մարզի Կոնստանտինովկա քաղաքին հասցված հրթիռային հարվածից հետո։
Ուկրաինայի նախագահ Վլադիմիր Զելենսկու պնդմամբ` հարվածի թիրախում է հայտնվել քաղաքի կենտրոնում գտնվող շուկան։ Վարչապետ Դենիս Շմիգալի խոսքով` հարվածի զոհերից առնվազն մեկը անչափահաս է։
Հայաստանի վարչապետի տիկինը Կիևում մասնակցում է Առաջին տիկնանց և ամուսինների երրորդ գագաթնաժողովին։
Ինչպես Ֆեյսբուքում գրել է Աննա Հակոբյանը, օրը սկսվել է «Նահատակ երեխաներ» անունը կրող ցուցահանդես այցելությամբ, «որտեղ ոգեկոչեցինք այս պատերազմում զոհված երեխաների հիշատակը»։
«Ինչպես նշել էի այս հունիսին Բրյուսելում «Կին քաղաքական առաջնորդներ 2023» գագաթնաժողովում իմ ելույթում, 2022 թվականի փետրվարի 24-ից մինչ օրս Ուկրաինայում զոհվել է շուրջ 500 երեխա։ Այսօր իմացանք, որ նրանցից ամենափոքրը 2 օրական է եղել, ամենամեծը 17 տարեկան», - գրել է Հակոբյանը՝ ամփոփելով.
«Պատերազմներում նահատակվող երեխաները մեր բոլորի՝ մեծերիս ձախողումն են. աններելի, անուղղելի, անվերականգնելի ձախողումը»։
ԱՄՆ պետքարտուղար Էնթոնի Բլինքենը ժամանել է Կիև, հաղորդում են ուկրաինական լրատվամիջոցները:
Ուկրաինացի լրագրող Իլյա Պոնոմարենկոն տեսանյութ է հրապարակել, որում Բլինքենին ցույց են տալիս Պատրոն անունով աշխարհահռչակ շանը, որը մասնակցել է ուկրաինական տարածքների ականազերծմանը։
Անցած գիշեր Կիևը և մի շարք այլ ուկրաինական բնակավայրեր զանգվածային հրթիռակոծության են ենթարկվել ռուսական ուժերի կողմից։ Օդային հարձակումը դադարել է ԱՄՆ պետքարտուղարի ժամանումից ընդամենը մի քանի ժամ առաջ։
Էնթոնի Բլինքենը վերջին անգամ Ուկրաինա էր այցելել ուղիղ մեկ տարի առաջ:
Ուկրաինայի նախագահ Վլադիմիր Զելենսկին երկրի արևելքում այցելել է հակահարձակման գործողություններում ներգրավված մարտական զորքեր։ Ուկրաինայի նախագահի կայքը հայտնում է, որ այցելությունը տեղի է ունեցել սեպտեմբերի 5-ին, Դոնեցկի մարզ կատարած աշխատանքային այցի շրջանակում։
Զելենսկին լսել է օպերատիվ իրավիճակի մասին բարձրաստիճան զինվորականների զեկույցները, զրուցել զինվորների հետ, նշված է հաղորդագրությունում։
Բրյանսկի նահանգապետ Վյաչեսլավ Գլադկովը հայտնել է, որ Ռուսաստանի սահմանապահները հետ են մղել «ուկրաինացի դիվերսանտների» գրոհը։
Ուկրաինայի կողմից կռվող «Ռուսական կամավորական կորպուսը», ստանձնելով գրոհի պատասխանատվությունը, հայտնում է, որ ռուսական կողմից երկու սահմանապահ է սպանվել։
"База" կայքն ավելի վաղ հաղորդել էր մեկ սահմանապահի զոհվելու ու մի վիրավորի մասին, նշելով, որ ուկրաինական կողմից դիվերսիոն խմբի գրոհի փորձը տեղի է ունեցել սեպտեմբերի 4-ի առավոտյան։
Հյուսիսային Կորեայի առաջնորդ Կիմ Չեն Ընը այս ամիս նախատեսում է Ռուսաստան մեկնել ու հանդիպել նախագահ Վլադիմիր Պուտինին, գրում են ամերիկյան լրատվամիջոցները։
Հաղորդվում է, որ կողմերը կքննարկեն Հյուսիսային Կորեայից Մոսկվային զենք մատակարարելու հնարավորությունը՝ Ուկրաինայի դեմ պատերազին աջակցելու համար։
Հանդիպման վայրն առայժմ հայտնի չէ, հեղինակավոր The New York Times-ի աղբյուրները հայտնել են, թե ամենայն հավանականությամբ՝ Հյուսիսային Կորեայի առաջնորդը կժամանի զրահապատ գնացքով։
Ուկրաինայի արտգործնախարար Դմիտրի Կուլեբան հայտարարել է, որ Ուկրաինան փաստական ապացույցներ ունի, որ անցած գիշեր ուկրաինական նավահանգիստները թիրախավորելիս ռուսական օդուժի անօդաչու թռչող սարքերը ընկել են սահմանակից Ռումինիայի տարածքում։ Այդ մասին Ուկրաինայի իշխանությունների այսօր առավոտյան տարածած հայտարարությունը Ռումինիայի ԱԳՆ-ն կտրականապես հերքել է։
Գերատեսչությունը շեշտել էր՝ ռուսական հարձակումը «ուղղակի սպառնալիքներ չի առաջացրել Ռումինիայի ազգային տարածքների կամ տարածքային ջրերի համար»: Ուկրաինայի արտգործնախարարը մինչդեռ կարծում է, որ հարևան երկրների մոտ միտում կա «չսրելու այս կամ այն իրադարձությունների մեկնաբանությունը, որպեսզի չներքաշվեն Ռուսաստանի հետ ուղիղ հակամարտության մեջ»։
Թուրքիայի նախագահ Թայիփ Էրդողանը և նրա ռուս գործընկեր Վլադիմիր Պուտինը երկուշաբթի օրը իրենց հանդիպման ժամանակ կկենտրոնանան սևծովյան հացահատիկի գործարքի վրա, քանի որ Թուրքիան ձգտում է Մոսկվային հետ բերել գործարքին, ասել է Էրդողանի արտաքին քաղաքականության գլխավոր խորհրդականը:
«Մենք այստեղ առաջատար դեր ենք խաղում: Մենք ամբողջ աշխարհից մեծ աջակցություն ենք տեսնում հացահատիկային միջանցքի իրականացման համար»,- A Haber հեռուստաալիքին տված հարցազրույցում ասել է Էրդողանի արտաքին քաղաքականության և անվտանգության հարցերով գլխավոր խորհրդական Ակիֆ Քըլըչը:
«Ներկայիս կարգավիճակը (հացահատիկի գործարքի-խմբ.) կքննարկվի երկուշաբթի գագաթնաժողովում: Հույս ունենք հաջողության հասնել, քանի որ սա մի իրավիճակ է, որն ազդում է ամբողջ աշխարհի վրա», - ասել է Քըլըչը:
Անկարան ընդունել է համաձայնագրի հետ կապված տեխնիկական բարդությունները, մասնավորապես, կապված ռուսական հացահատիկի և վճարման մեխանիզմների հետ, ասել է Քըլըչը: Խնդիրը վերաբերում է նաև միջազգային վճարային համակարգերին, ինչպիսին է SWIFT-ը, որը ներկայացնում է բազմակողմ մարտահրավեր, ավելացրել է նա:
Կիրակի գիշերը ռուսական զորքերը զանգվածային անօդաչու թռչող սարքով հարձակում են գործել Օդեսայի շրջանի վրա։ Ուկրաինայի ռազմաօդային ուժերի հրամանատարության տվյալներով՝ հարձակմանը մասնակցել է «Շահեդ» տեսակի 25 անօդաչու թռչող սարք։ Նրանցից 22-ը խոցվել են ՀՕՊ ուժերի կողմից։
Նավահանգիստներից մեկի ենթակառուցվածքը տուժել է անօդաչու թռչող սարքի հարվածից, այնտեղ հրդեհ է բռնկվել, որն արագ մարվել է։ Նախնական հայտնի է երկու տուժած քաղաքացիական անձանց մասին, նրանց ցուցաբերվել է բուժօգնություն։ Խոսքը, ըստ ամենայնի, Օդեսայի շրջանի հարավում գտնվող նավահանգիստներից մեկի մասին է։
Գիշերային հրետակոծության մասին հայտնում են նաև շրջանային զինվորական վարչակազմերի ղեկավարները։ Նրանց տվյալներով՝ մեկ մարդ զոհվել է Խերսոնի շրջանում, վեցը՝ վիրավորվել։ Դոնեցկի մարզում վերջին մեկ օրվա ընթացքում երկու խաղաղ բնակիչ է զոհվել, ևս երկուսը վիրավորվել են։