«Անցած գիշեր ուկրաինական բանակը կրկին փորձել է հարվածել Ղրիմի կամրջին», - հայտարարում է Ռուսաստանի Պաշտպանության նախարարությունը։
Գերատեսչության պնդմամբ՝ Ուկրաինայի Զինված ուժերը հարվածները փորձել են իրականացնել երեք ծովային անօդաչուների միջոցով, որոնք, սակայն, ոչնչացվել են։
«Չնայած հարձակումն իր նպատակին չի հասել, սակայն երթևեկությունը Ղրիմի կամրջով դադարեցվել է ավելի քան երեք ժամով», - հաղորդում են ռուսական աղբյուրները։
Ուկրաինական հետախուզության ղեկավար Կիրիլ Բուդանովը The War Zone կայքին երեկ երեկոյան հայտնել է, որ նախօրեին Պսկովի օդանավակայանի վրա դրոններով հարձակումը ուկրաինական ուժերն իրականացրել են Ռուսաստանի տարածքից։
Կայքը նաև արբանյակային լուսանկարներ է հրապարակել, որոնցում երևում են հարձակման հետևանքները՝ արդեն վնասված ինքնաթիռները։
Ուշագրավ է, որ Ուկրաինան սովորաբար չի մեկնաբանում Ռուսաստանի տարածքում դրոններով հարվածները, և Ուկրաինայի առնչությունը հաստատող այսպիսի ուղիղ հայտարարություններ շատ հազվադեպ են հնչում։
Պսկովը Ուկրաինայից 800 կիլոմետր հեռավորության վրա է, և դրոններով գրոհից հետո մեծ հարց էր, թե որտեղից է կատարվել այդ հարձակումը։ Այդ հարցը ակտիվ քննարկվում էր ռուսական սոցցանցերում, հնչում էին տարբեր վարկածներ անգամ այն մասին, որ անօդաչուները հնարավոր է Բելառուսի վրայով են հասել Ռուսաստան։ Ռուսաստանի իշխանությունները պաշտոնապես որևէ հայտարարություն չեն արել, թե որտեղից կարող էր այդ գրոհն իրագործվել։
Մոսկվայի քաղաքային իշխանությունները հայտնում են անօդաչու թռչող սարքերով քաղաքի վրա հերթական հարձակման մասին։ Մոսկվայի քաղաքապետ Սերգեյ Սոբյանինն առավոտյան հայտարարել է, որ մերձմոսկովյան Լյուբերցիի մոտ հակաօդային պաշտպանության ուժերն անօդաչու են խոցել։ Ըստ պաշտոնյայի՝ զոհեր և ավերածություններ չկան։
Ռուսական տելեգրամյան ալիքների փոխանցմամբ՝ մայրաքաղաքի «Վնուկովո», «Դոմոդեդովո», «Շերեմետևո» և «Ժուկովսկի» օդանավակայաններում 38 չվերթ է հետաձգվել, 23-ը՝ չեղարկվել։
Անօդաչու թռչող սարքերի հարձակման մասին է հայտարարել նաև Կուրսկի մարզի նահանգապետ Ռոման Ստարովոյտը։ «Առավոտյան երկու ուկրաինական անօդաչու թռչող սարքեր հարձակվել են Կուրչատովի վրա։ Տուժել է գրասենյակային և բնակելի շենք։ Դեպքի վայր են մեկնել մասնագետները, գնահատում են վնասի չափը։ Մանրամասները ճշտվում են», - գրել է պաշտոնյան։
Ռուսաստանում վերջին մեկ օրվա ընթացքում անօդաչու թռչող սարքեր են խոցվել վեց շրջաններում՝ հինգը՝ Բրյանսկի մարզում, երկուական՝ Ռյազանի և Մոսկվայի շրջաններում, մեկական՝ Օրյոլի և Կալուգայի մարզերում։ Նաև օգոստոսի 30-ի գիշերը անօդաչու թռչող սարքերով հարձակման է ենթարկվել Պսկովի օդանավակայանը։
Ուկրաինայի արտգործնախարար Դմիտրի Կուլեբան եվրոպական երկրների արտգործնախարարներին հորդորել է սպառազինություններ տրամադրել Ուկրաինային, մասնավորապես նաև հակաօդային պաշտպանության համակարգեր՝ ապահովելու համար հացահատիկի արտահանման միջանցքի անվտանգությունը։
«Խնդրում են դիտարկել, թե ինչպես կարող եք օգնել՝ պաշտպանելու հացահատիկի արտահանման միջանցքը, քանի դեռ նավերը կգտնվեն Ուկրաինայի տարածքային ջրերում, մինչև Ռումինիա հասնելը։ Օգնություն ասելով նկատի ունեմ հակաօդային պաշտպանության համակարգեր»,- իսպանական Տոլեդոյում եվրամիության արտգործնախարարների հանդիպմանն ասել է Կուլեբան։
Թուրքիայի նախագահ Ռեջեփ Էրդողանը սեպտեմբերի 4-ին Սոչիում հանդիպելու է Ռուսաստանի նախագահ Վլադիմիր Պուտինին՝ քննարկելու հացահատիկի գործարքն ու Ուկրաինայի հակամարտությունը։ Այս մասին հաղորդում է Reuters գործակալությունը՝ վկայակոչելով թուրքական երկու տարբեր աղբյուրներ։
Այսօր մեկնարկում է Թուրքիայի արտգործնախարար Հաքան Ֆիդանի երկօրյա այցը Մոսկվա։ Նա բանակցելու է Ռուսաստանի իր գործընկեր Սերգեյ Լավրովի հետ։
Հանդիպման հիմնական հարցերից մեկը վերաբերելու է հացահատիկի արտահանման այլընտրանքային գործարքին։ «Ռուսաստանի և Թուրքիայի արտգործնախարարները մտադիր են քննարկել Ռուսաստանի նախագահ Վլադիմիր Պուտինի առաջարկը կյանքի կոչելու պարամետրերը», - հաղորդում է Ռուսաստանի արտգործնախարարությունը։ Պուտինի նախաձեռնությունը ենթադրում է զեղչված գներով, Կատարի ֆինանսավորմամբ, 1 միլիոն տոննա ռուսական հացահատիկի առաքում Թուրքիա՝ թուրքական ձեռնակություններում այն մշակելու և ավելի կարիքավոր երկրներ մատակարարելու համար։ Մոսկվան այդ ծրագիրը դիտարկում է որպես սևծովյան գործարքին օպտիմալ այլընտրանք:
Լավրովն ու Ֆիդանը նաև մտքեր են փոխանակելու ուկրաինական ճգնաժամի իրավիճակի շուրջ, քննարկելու են քաղաքական-դիվանագիտական կարգավորման հնարավոր ուղիները, շոշափվելու է հումանիտար թեման, մասնավորապես՝ գերիների փոխանակման վերաբերյալ:
«Ռուսական կողմը նաև պլանավորում է բարձրացնել Անկարայի և Կիևի միջև ռազմատեխնիկական համագործակցության զարգացման կործանարարության թեման», - նշված է հանդիպումից առաջ Ռուսաստանի արտգործնախարարության տարածած հաղորդագրությունում։
Ռուսաստանի միանգամից 5 շրջաններ ենթարկվել են անօդաչու թռչող սարքերի զանգվածային հարձակման, Պսկովի օդանավակայանում ռազմատրանսպորտային օդանավեր են ոչնչացվել, իսկ Ուկրաինայի վրա ռուսական ուժերի հրթիռակոծության հետևանքով Կիևում երկու մարդ է զոհվել։
Պատերազմի սկզբից ի վեր անցած գիշերվա հարձակումը Ռուսաստանի վրա անօդաչուների ամենազանգվածային հարձակումն էր։ Կրեմլի մամուլի խոսնակն ասել է, որ Վլադիմիր Պուտինին զեկուցվել է հարձակման մասին, նշելով, որ գլխավոր և գերագույն հրամանատարը մշտապես և օպերատիվ ստանում է ողջ տեղեկատվությունը։
Դիմտրի Պեսկովը ահաբեկչություն է որակել դրոնների հարձակումը։ Փաստորեն, երբ Ռուսաստանն է հրթիռներով, դրոններով ու ավիացիայով ռմբակոծում Ուկրաինային, ՄԱԿ-ի տվյալներով՝ միայն խաղաղ բնակիչների զոհերի թիվը մոտենում է 9,5 հազարի՝ Ռուսաստանը դա «հատուկ ռազմական գործողություն» է կոչում, իսկ ուկրաինական հարձակումները՝ ահաբեկչություն։
«Իսկապես շարունակվում է Կիևի ռեժիմի ահաբեկչական ակտիվությունը, անօդաչուների գերակշիռ մեծամասնությունը թռչում է քաղաքացիական օբյեկտների վրա։ Մենք շարունակում ենք և կշարունակենք հատուկ ռազմական գործողությունը, որպեսզի արմատախիլ անենք նման սպառնալիքները մեզ համար»,- այսօր ասել է Կրեմլի խոսնակը։
Իսկ Արտգործնախարարության խոսնակ Մարիա Զախարովան հայտարարել է, որ ուկրաինական անօդաչուների հարձակումն «անպատիժ չի մնա»։
Նախնական տեղեկություններով՝ Ռուսաստանում մարդկային զոհեր չկան։
ԱՄՆ-ը հայտարարել է Ուկրաինային 250 միլիոն դոլարի լրացուցիչ ռազմական օգնության նոր փաթեթի մասին, որը ներառում է զինամթերք, սարքավորումներ և պահեստամասեր, ինչպես նաև անձնակազմի վերապատրաստում։
«Այսօր մենք հայտարարում ենք ռազմական օգնության հաջորդ փաթեթի մասին, որը կօգնի Ուկրաինային պաշտպանել իր տարածքը և իր ժողովրդին: Այս փաթեթը պարունակում է կարևոր հնարավորություններ, որոնք կօգնեն Ուկրաինային մարտի դաշտում», - ասել է Միացյալ Նահանգների պետքարտուղար Էնթոնի Բլինքենը երեքշաբթի օրը Պետդեպարտամենտի կայքէջում հրապարակված հայտարարությունում:
2022 թվականի փետրվարին ռուսական ներխուժման սկզբից ի վեր Ուկրաինան ԱՄՆ-ից արդեն ստացել է ավելի քան 43 միլիարդ դոլարի օգնություն:
Այս գիշեր անօդաչու թռչող սարքերի հարձակում է եղել Ռուսաստանի հինգ շրջանների և Ղրիմի Սևաստոպոլ քաղաքի վրա:
Կեսգիշերն անց Պսկովի նահանգապետը հայտնել է, որ քաղաքի օդանավակայանի վրա անօդաչու թռչող սարքի հարձակումը հետ է մղվել, զոհեր և վիրավորներ չկան։ Հրդեհ է բռնկվել՝ չորս Իլ-76 ինքնաթիռ է վնասվել:
ՌԴ պաշտպանության նախարարությունը հայտնել է երեք անօդաչու թռչող սարքի ոչնչացման մասին Բրյանսկի մարզում, մեկի՝ Օռլովսկի շրջանում։
Գերատեսչությունը հայտնել է նաև Ռյազանի և Կալուգայի շրջաններում խոցված անօդաչու թռչող սարքերի մասին:
ՌԴ պաշտպանության նախարարությունը հաղորդում է, որ Սևծովյան նավատորմի ավիացիան ոչնչացրել է 4 մոտորանավակ Ուկրաինայի Զինված ուժերի դեսանտային խմբերով՝ մինչև 50 հոգի:
Կիևում և Կիևի մարզում գիշերը պայթյուններ են լսվել։ Կիևում հրթիռակոծության հետևանքով երկու մարդ է զոհվել, հայտնում են Ուկրաինայի մայրաքաղաքի իշխանությունները։
Քաղաքի Շևչենկովսկի շրջանում բեկորներ են ընկել վարչական շենքի վրա, երկու մարդ մահացել է, ևս երկուսը հոսպիտալացվել են, հայտնել է Կիևի քաղաքապետ Վիտալի Կլիչկոն։
Ավելի ուշ Կիևի քաղաքային ռազմական վարչությունը պարզաբանել է, որ զոհվել է երկու պահակ։
Ավելի վաղ հաղորդվել էր Օդեսայում, ինչպես նաև Կրիվոյ Ռոգում և Չերկասկի շրջանում պայթյունների մասին։ Կիևի մարզում վեց առանձնատուն է վնասվել, հայտնել են ոստիկանությունից։ Ամբողջ Ուկրաինայում օդային տագնապ էր հայտարարվել։
Օգոստոսի 30-ի գիշերը Ուկրաինայի տարածքում ռուսական հարձակման ժամանակ բոլոր 28 թևավոր հրթիռները և 16 հարվածային անօդաչու թռչող սարքերից 15-ը խոցվել են, ասել է Ուկրաինայի Զինված ուժերի գլխավոր հրամանատար Վալերի Զալուժնին։